КҮНТІЗБЕ 2024
28.03.2023
«Алты алаштың ханы Әбілқайыр»
Ғ.Сланов атындағы облыстық ғылыми әмбебап кітапханасында кіші жүз ханы, қолбасшы Әбілқайырдың туғанына 330 жыл толуына орай «Алты алаштың ханы Әбілқайыр» атты тарихи-танымдық сағат өтті. Тарихи- танымдық сағатқа №16 мектептің оқушылары қатысты.
Қай елдiң де айбынын асырып, айдынын тасытатын басты белгiсi – ұрпаққа мұра, ұлтқа ұран болатын ұлы тұлғалары бар. Қазақ халқының осындай ұлы тұлғаларының бiрі – Әбілқайыр хан. Қазақ жерін жаудан қорғау, тұтастығын сақтауда үлкен атақ-абыройға ие болған жауынгер батыр, билеуші. Бар ғұмырын азаттық жолындағы күреске арнаған қазақ хандығы тарихында жасындай жарқыраған тұлға. Тарихи-танымдық сағатта: «Әбілқайыр хан», «Әбілқайыр хан. Аңыз бен ақиқат», «Әбілқайыр хан және Бопай ханым», «Жүз жиырма тұңғыш», «Жүз тұңғыш», Ә.Мұқтар «Азаттық таңы жолында», Ә.Мұқтар, Е.Сыдықов «ХVII-ХIХ ғасырдағы Қазақ хандығы», Д.Кэстль «1736 жылы кіші жүз ханы Әбілқайырға барып қайтқан сапар туралы», «Қазақ халқының тарихи тұлғалары», І.Есенберлин «Көшпенділер», Ә.Кекілбаев «Үркер» тарихи шығармалары оқырмандарға насихатталды.
Мақсаты: қазақ елінің өркендеп, нығаюына саналы ғұмырын арнаған білікті қолбасшы, айбынды хан, ұлы бабамыз Әбілқайырдың Қазақ мемлекетінің тұтастығы мен тәуелсіздігі жолында анталаған жаулармен алыса жүріп жасаған ұлы тұлғаның өнегелі де ерлік істері жайлы жазылған әдебиеттерді насихаттау.
