КҮНТІЗБЕ 2024
17.05.23
«Мәңгілік Махамбет» кітабының тұсаукесері
Бүгін Ғ.Сланов атындағы облыстық ғылыми әмбебап кітапханасында меценат, жазушы, ҚР Жазушылар Одағының мүшесі Жалғасқали Мұсағалиұлы Дүтмағанбетовтың «Мәңгілік Махамбет» кітабының тұсаукесері өтті.
Шараны жазушы, өлкетанушы, Қазақстан Журналистер Одағы және Махамбет сыйлықтарының иегері, ҚР Жаратылыстану ғылымдары Академиясының академигі, Қазақстанның Құрметті журналисі, «Бірлік» Алтын орденінің иегері Өтепберген Әлімгерейұлы жүргізді.
Алғашқы сөзді қала әкімінің орынбасары Ермұханов Нұржан Мақсотұлы сөйлеп, дауылпаз ақын, ақберен батыр Махамбет Өтемісұлының туғанына 220 жыл толуына орай жазылған «Мәңгілік Махамбет» кітабының оқырмандары көп болуына тілектестік білдірді.
Шараға Қазақстанның еңбек сіңірген қайраткері, Қазақстан Жазушылар Одағы Атырау облыстық филиалының төрағасы Жылқышиев Қойшығұл Өмірұлы, ақын, Халықаралық «Шабыт» фестивалінің лауреаты, Махамбет сыйлығының иегері Әлия Бекежанқызы Дәулетбаева, зейнеткер, Денсаулық сақтау саласының үздігі Төремұратов Сәрсенғали, зейнеткер, ҚР еңбегі сіңген геологы Мұқашев Сапарғали, автордың құрдасы, сыныптасы Айдаралиева Сәуле, Махамбет атындағы облыстық академиялық қазақ драма театрының актері Ғалымжанов Оралбай және тұрақты оқырмандар қатысты.
Аталмыш кітаптың тұсауын қала әкімінің орынбасары Ермұханов Нұржан Мақсотұлы мен кітаптың жарыққа шығуына үлесін қосқан автордың жақыны, зейнеткер Владимир Сандыбайұлы кесті.
Шара барысында кеш қонақтары жылы лебіздерін білдіріп, автор оқырмандар тарапынан қойылған сұрақтарға жауап берді.
Сонымен қатар кітапхана атынан кітап қорын толықтыруға қосқан үлесі үшін Жалғасқали Дүтмағанбетовке Алғыс хат тапсырылды.
