КҮНТІЗБЕ 2024
15.01.2020 ж.
«Мұраты биік мұнайлы мекен»
Ғ. Сланов атындағы Атырау облыстық ғылыми әмбебап кітапханасында мұнай-газ саласы әдебиеттерін насихаттау мақсатында «Мұраты биік мұнайлы мекен» атты көрме залының ашылу салтанаты ұйымдастырылды. Шараға ақын, журналист, мәдениет қайраткері Аронов Жеңіс, ақын, ҚР салалық Минералдық ресурстар академиясының академигі Сейітов Нәсіпқали, Облыстық Мәслихаттың депутаты, экономика ғылымдарының докторы, профессор Шырдабаев Мағауия, Қазақстан журналистикасының қайраткері Хамит Әубәкіров, Атырау қаласының құрметті азаматы Сүлейменов Сүйеу қатысып, өз пікірлерін білдірді.
Сонымен қатар, Атырау облысы Мәдениет, архивтер және құжаттама басқармасына қарасты мәдениет және өнер мекемелерінің басшылары, №34 Көпсалалы мектеп-гимназияның, Жалпы білім беретін №37, №40 орта мектептердің шәкірттері қатысты.
Ұлы Абайдың 175 жылдығына орай «Абай-дана, Абай-дара қазақта» атты кітап көрмесін көпшілікке таныстырған Оқырмандарға қызмет көрсету бөлімінің жетекші маманы Ғалия Байешева кітапхана қорындағы Абай шығармаларының жинақтарымен таныстыра отырып, Абай мұраларын зерттеушілердің кітаптарын тілге тиек етті. Шараға қатысқан кітапхананың тұрақты оқырмандары ақынның «Ғылым таппай мақтанба», «Интернатта оқып жүр», «Көңілім қалды достан да, дұшпаннан да...», «Жасымда ғылым бар деп ескермедім» атты өлеңдерін мәнерлеп оқып, көпшілік ризашылығына бөленді.
Әйгілі ғалым, ұлы ойшыл Әбу Насыр әл Фарабидың туғанына 1150 жыл толуына орай «Тарихтағы рухани тұлға» атты тұрақты кітап көрмелерінің таныстырылымы ұйымдастырылды. Шараға жиналған оқырмандар қауымын кітапханашы Айбарша Рахметова Әл Фарабидың еңбектерімен, трактаттарымен, көптомдық шығармалар жинақтарымен кеңінен таныстырды.
Шара мақсаты: Мұнай-газ саласы әдебиеттерін кеңінен насихаттау, жастарды еліміздің мұнай саласын дамытуда елеулі қызмет атқарған мұнай ардақтыларының еңбектерімен таныстыру, биылғы жылы мемлекеттік деңгейде аталып отырған Абайдың 175 жылдығы, Әбу Насыр Әл Фарабидың 1150 жылдығы туралы ақпарат беру, шығармаларын насихаттау.
