КҮНТІЗБЕ 2024
23.11.2022
«Меценат – жазушы»
Ғ.Сланов атындағы облыстық ғылыми әмбебап кітапханасында жазушы, өлкемізге белгілі кәсіпкер, меценат, Қазақстан Жазушылар Одағының мүшесі Дүтмағанбетов Жалғасқали Мұсағалиұлымен «Меценат – жазушы» атты тақырыппен кездесу кеші ұйымдастырылды.
Шараға Жалғасқали Мұсағалиұлының балалық шақтан бірге өскен достары, құрдастары, еңбек жолындағы және кәсіпкерлік саласындағы үзеңгілес жолдастары қатысып, қызығы мен қиындығы мол өмір жолынан сыр шертісті. Автордың кітапхана қорына сыйлаған 2001 жылы жарық көрген «Тұлпар және оның тұяқтары» еңбегінде автор өзінің ата тегі, ұлағатты ұрпақ жалғастығы туралы баяндайды. 2021 жылы жарыққа шыққан «Тағдырлар тоғысқанда» кітабында автордың анасы мен түп нағашысы болып келетін алдаспан ақын Махамбет Өтемісұлы туралы естеліктерді оқып отырғанда тарих қойнауында жоғалған қазақ халқының құндылықтары: тіл, әдебиет, мәдениет, тәрбие, тектілік туралы тұщымды ой қозғайды. Қазақтың алтын қазығы болып саналатын ата-салтымызды дәріптей отырып жастарымызды осы тұрғыда тәрбиелеуге жетелейді. Кездесу кешіне қатысқан жастар авторға отбасы тәрбиесі, тектілік, мамандық таңдау, кәсіпкерлік туралы көкейлерінде жүрген сұрақтарына жауаптарын алды.
Мақсаты: Өлкеміздің дамуына үлес қосып жүрген меценат-жазушы Жалғасқали Мұсағалиұлының игі істерін жас ұрпаққа насихаттау.
