КҮНТІЗБЕ 2024
27.07.2022 ж.
«Нағыз ақын мәңгі жастық шуағына оранар...»
Ғ.Сланов атындағы облыстық ғылыми әмбебап кітапханасында ақын, Қазақстанның халық жазушысы, Қырғызстанның халық ақыны Мұхтар Шахановтың туғанына 80 жыл толуына орай «Нағыз ақын мәңгі жастық шуағына оранар...» атты әдеби-сазды қонақжай кеші ұйымдастырылды. М.Шахановтың өмірі мен шығармашылығы туралы кітап көрмесі жасақталып, слайд көрсетілді. Кітапханашы Нсанбекова Бике Мұхтар Шахановтың өмірі мен шығармашылығы туралы айта келе, ақынның шығармалары дүние жүзінің 40-тан астам тілдеріне аударылғанын қазақ тарихында және әлемдік әдебиетте өз орны бар екенін, қазақ жастарының бірнеше ұрпағы Шаханов жырларын жаттап өскенін жоққа шығара алмайтынын баяндап берді.
Кеш барысында ақынның өлеңдері мәнерлеп оқылып, халық арасына кең тараған әндері шырқалды. Кітапхана оқырмандары Есенгалиева Дария «Ғашықтық», Богданова Асем «Танакөз», Таласбай Шыңғыс «Төрт ана» атты ақынның өлеңдерін мәнерлеп оқып берді. Кеш қонақтары «Белсенді ұзақ өмір сүруді әлеуметтік қолдау орталығының» мүшелері Сұлтанғалиева Тұрсын, Садиева Гүлнар, Жалмағамбетова Күлима, Мұхамбетжанова Талшын, Оразалина Айкен, Кенжебаева Зина, Утегалиева Нурзила, Нұрғалиева Роза ақынның әндерін шырқап, өлеңдерін оқып кештің жақсы өтуіне өз үлестерін қосты.
Мақсаты: Ақын, тіл жанашыры, өз ұлтының патриоты М.Шахановтың рухты өлеңдері мен әндерін оқырмандарға насихаттау.
