КҮНТІЗБЕ 2024
07.02.23
«Тағдыры сын, жаратылысы сыншы» әдеби-танымдық сағат
Ғ.Сланов атындағы Атырау облыстық ғылыми әмбебап кітапханасында жазушы, Қазақстанның еңбек сіңірген қайраткері, ғалым Зейнолла Серікқалиұлының туғанына 85 жыл толуына орай «Тағдыры сын, жаратылысы сыншы» атты кітап көрмесі мен әдеби-танымдық сағат ұйымдастырылды. Кітап көрмесіне Х.Досмұхамедов атындағы Атырау университетінің студенттері мен №35 мектептің 11 сынып оқушылары қатысты.
Зейнолла Серікқалиұлы 1938 жылы Атырау облысы, Құрманғазы ауданы, Нұржау ауылында дүниеге келген. Әл-Фараби атындағы қазақ мемлекеттік ұлттық университеттің филология факультетін бітірген. Абай атындағы қазақ педагогика институтының аспирантурасын бітірген. «Пионер», «Жұлдыз» журналдарында, Жазушылар одағында, «Социалистік Қазақстан» газетінде, М.Әуезов атындағы әдебиет және өнер институтында жауапты қызметтер атқарды (редактор, бөлім меңгерушісі, жауапты хатшы т.б.)
Қазақ КСР жоғарғы кеңесінің құрмет грамотасымен, «Тәуелсіздіктің он жылдығы» медалімен марапатталған.
Зейнолла Серікқалиұлының шығармашылығы, соңына қалдырған мұрасы, ғылыми-зерттеу, сын кітаптары, тамаша аудармалары, мәдениет, өнер жайындағы танымдық жинақтар үлкен сөрені толтырып тұр. Зейнолла Серікқалиұлының кітаптарының бір ерекшелігі – олардың мазмұны, көтерген мәселесі қосалқы атауынан айқын аңғарылады.
Кітап көрмесіне автордың «Ойлар, толғаныстар» (1967), «Жылдар сазы» (1971), «Ақыл таразысы» (1990), «Дүниетану даналығы» (1994), «Тағдыр» (1996), «Сын кітабы» (1997), 2005 жылы жарық көрген «Шапағатты парасат» еске алу жинағына қазақтың қабырғалы қаламгері аса танымал талант иесі атанып, әдеби сынның көш басында болған Зейнолла Серікқалиұлының ажар-келбеті жайында жазылған замандастарының естелік эсселері топтастырылған. «Золотая эмблема» (2005), «Сын кітабы» (2005) кітаптарында қайратты қаламгердің таңдамалы мақалалары мен зерттеулер жинақталған. «Зейнолла» (2002) Атырау ақын жазушыларының кітапханасы «Қазына» №32 кітабында әдеби – қоғамдық ой, сын – зерттеу, толғаныстары енгізілген. Зейнолла Серікқалиұлының үш томдық «таңдамалы шығармалары» 2011-2012 ж. әдеби мақалалар мен зерттеулер жинақталған және т.б. әдебиеттері қойылды.
Мақсаты: Зейнолла Серікқалиұлының шығармаларын оқырман қауымға кеңінен насихаттау.
