КҮНТІЗБЕ 2024
20.04.23
«Талантқа тағзым» суретті кітап көрмесі
Ғ.Сланов атындағы облыстық ғылыми әмбебап кітапханасында актер, Қазақстанның халық әртісі Нұрмұхан Жантөриннің туғанына 95 жыл толуына орай «Талантқа тағзым» тақырыбында суретті кітап көрмесі ұйымдастырылды. Кітап көрмесін таныстыру барысында кітапханашы Н.Жантөрин туралы мәліметтерді әңгімесіне арқау етті.
Нұрмұхан Жантөрин 1928 жылы 22 сәуірде Атырау облысы, Махамбет ауданында дүниеге келген. 1952 жылы Ташкент театр өнері институтының актерлік факультетін бітірген. 1952-1967 жылдары және 1988 жылдан өмірінің соңына дейін Қазақ драма театрының сахнасында өнер көрсетті (1967-1988 жылдары «Қазақфильм» киностудиясында актер болды). Н.Жантөрин 1948 жылдан киноға түсе бастап, 30-дан аса фильмде негізгі рөлдерді сомдаған. Ол жасаған көркем бейнелер ұлттық ерекшеліктерімен дараланып, талант құдіретін танытты. Бейбарыс бейнесі актердің кинодағы соңғы рөлдерінің бірі. Бейбарыс бала күнінде қыпшақ даласында тұтқынға алынып, жат жерде ерен ерлігімен, асқан ақылымен құлдықтан хандыққа дейін көтерілген, Египеттей алып елді 17 жыл бойы билеген ұлы әміршінің ұмытылмас бейнесін жасауы қазақ өнерінде қайталанбас құбылыс екені даусыз.
Кітап көрмесіне актердің өмірбаяны, еңбектері туралы жазылған «Қазақстан ұлттық энциклопедия» (2001ж.), «Аңызға айналған актер» (2004ж.), «Қазақ мәдениеті» (энциклопедиялық анықтамалық) (2005ж.), «Нурмухан Жантурин» (2007ж.), «Я-актер, Я-человек, высшее достижение создателя» (1997г.) және т.б әдебиеттер қойылып оқырмандар назарына ұсынылды.
Мақсаты: Қазақ кино өнерін дамытуда ерекше қолтаңбасын қалдырған актер Нұрмұхан Жантөрин туралы оқырман қауымға насихаттау.
