КАЛЕНДАРЬ 2024
03.07.23
«Қаламынан терең ойлы жыр төгілген сыршыл лирик» кітап көрмесі
Ғ.Сланов атындағы облыстық ғылыми әмбебап кітапханасында ақын, ойшыл, аудармашы Шәкәрім Құдайбердиевтің туғанына 165 жыл толуына орай «Қаламынан терең ойлы жыр төгілген сыршыл лирик» атты кітап көрмесі ұйымдастырылды. Ұлтымыздың рухани ұстазы, ұлы Абайдың ізбасары, оның дәстүрін жалғастырушы, қазақ халқының ғұлама ойшылы Шәкәрім Құдайбердіұлы жарты ғасырдан астам өмір сүрген кезеңінде әдебиеттің барлық жанрында қоғамның әр саласында өзінің ой-толғамымен із қалдырған. Ол – өз заманында иісі қазақ жұртының дүниетанымы мен әдет-ғұрпының дамуына үлес қосқан, философиялық ілімімен өшпес мұра қалдырған ұлы тұлға.
Кітап көрмесіне «Шәкәрімтану мәселелері» көп томдық сериялық жинақтары, Ш.Құдайбердіұлы «Үш анық», «Три истины», Е.Сыдықов «Шәкәрім Құдайбердіұлы» фотокітап екі тілде, Е.Сыдықов «Шәкәрім» ғылыми-танымдық басылым, «Шәкәрім және Алашорда», Д.Сейсенұлы «Шәкәрім», «Бес арыс» шығармалары кітапхана оқырмандарына насихатталды.
Сонымен қатар атаулы күнге Х.Досмұхамедов атындағы Атырау университетінің 1 және 2 курс студенттері өз үлестерін қосып, әңгіме сағатын өткізді. Шарада Шәкәрім Құдайбердіұлының өлеңдері талқыланды. Шәкәрім Құдайбердіұлының өмірбаяны туралы бейнеролик ұсынылып, өмірбаянымен танысты.
Мақсаты: Қазақтың бай да құнарлы поэзиясынан сусындап, ауыз әдебиеті мұраларының табиғатымен нәрленген Шәкәрім қажы туындыларының өзіндік өрнегіне бойлай отырып, көркем сөз шеберінің ақындық дүниетанымы мен идеяларын кейінгі ұрпақ санасына дарыту, философиялық тұжырымдамамен таныстыру.
