КАЛЕНДАРЬ 2024
16.07.2021 ж.
«Дала самалы»
Ғ.Сланов атындағы облыстық ғылыми әмбебап кітапханада айтыскер ақын, қарымды қаламгер, Журналистер Одағының мүшесі Құрыш Елемесұлының «Дала самалы» кітабының тұсаукесері өтті.
Рәсімді кітапхана басшысы, Мәдениет саласының үздігі Сара Салахединқызы жүргізіп отырды. Қатысушылыр назарына «Өз өлкемде өлеңмен сырласамын...» атты кітап көрмесі мен деректі фильм ұсынылды. Д.Нұрпейісова атындағы академиялық қазақ халық аспаптар оркестрінің әншісі Берік Амантаев ән шырқап, кеш шырайын аша түсті.
Шараға қатысқан ҚР Экология министрінің кеңесшісі Сәрсенбай Құрманұлы Еңсегенов кітап авторының өз әкесімен жақсы жолдас болғанын, бала күнінде әңгімелерін тыңдап өскенін, өнегелі істерін тілге тиек етті.
Қазақстанның Құрметті журналисі Төлеген Берішбай, журналист, ақынның шәкірті Т.Амандосов сыйлығының иегері Нұрым Ерғалиев, ақын, әдеби сыншы, тұсауы кесілген кітаптың жарыққа шығуына үлкен үлес қосқан Гүлзада Рахметқызы өздерінің естеліктерімен бөлісіп, кітапқа ақжол тіледі. Өз кезегінде «Атырау» телеарнасының директоры Қанат Әуесбай, Облыстық Журналистер Одағының төрайымы Алма Қалаусариева да өздерінің ақжарма тілектерімен бөлісті.
Тұсаукесерге онлайн тәртібінде ҚР Ұлттық академиялық кітапханасының басшысы Ү.Дәуренбекқызы қосылып, барша қатысушыларға ыстық лебіз білдіріп, сәттілік тіледі. Кітап авторының РФ Астрахань қаласынан, Қалмақ елінен, Құрманғазы ауданынан т.б. туған-туыстары мен шәкірттері де онлайн тәртібінде сәлем жолдады.
