КАЛЕНДАРЬ 2024
21.06.2022 ж.
«Ғұлама ғұмыр айнасы»
Ғ.Сланов атындағы облыстық ғылыми әмбебап кітапханасында ұлы жазушы, қоғам қайраткері, ғұлама ғалым М.Әуезовтің туғанына 125 жыл толуына байланысты «Ғұлама ғұмыр айнасы» атты тақырыппен кітап көрмесі жасақталып, кітапхана оқырмандарының назарына ұсынылды.
М.Әуезовтің теңдесі жоқ мұрасы, әлемдік әдебиетке қосқан үлесі, романдары мен повестері, драматургиясы мен әдебиеттану саласындағы шығармалары, Абайтану мен публицистикасы қазақ халқының мәдениетіне қосқан ұлттық қазына болып табылады. Жазушының «Абай жолы» эпопеясы ұлтымыздың сан ғасырлық тұстарын көркем оймен кестелеген, халқымыздың абыройын асқақтатқан даналық дастаны, дала тарихы мен философиясы болды. М.Әуезов ұзақ жылдар бойы Қазақ мемлекеттік университетінде қазақ әдебиеті тарихынан студент жастарға лекция оқыды. Олардың ғылыми жұмыстарына жетекшілік етті. Қазақстан Ғылым академиясының академигі ретінде республика көлемінде әдебиеттану жұмысын жүйелеп, басшылық жасады. Халықтың ең қымбат тарихи ескерткіші деп бағаланған қазақ эпосы мен фольклорын зерттеудегі еңбектерінің орны айырықша. Халқымыздың рухани мәдениетінің қалыптасуы мен дамуына театр, драматургия мәселелеріне ерекше ынта қойды.
Кітап көрмесіне М.Әуезовтің: Уақыт және әдебиет «Қазақ мемлекеттік көркем әдебиет баспасы» 1962, Қилы заман «Жазушы» 1979, әңгімелері «Жалын» 1987, Әдебиет тарихы «Ана тілі» 1991, Абай Құнанбаев «Санат» 1995, Абайды білмек парыз ойлы жасқа «Санат» 1997, Әдебиет туралы «Санат» 1997, Абайтану дәрістерінің дерек көздері «Санат» 1997, Қорғансыздың күні «Атамұра» 2002, Абай жолы роман-эпопея 1, 2, 3 томдары «Жазушы» 2009, М.Әуезовтің 50 томдық шығармалар жинағы 2011 және 2014 жылдары «Жібек жолы» баспасынан жарық көрген.
Мақсаты: Әлем таныған ұлы жазушы М.Әуезовтің шығармаларын оқырмандарға оқуға ұсынып, насихаттау.
