КАЛЕНДАРЬ 2024
14.08.23
«Құрманғазының мәңгілік мұрасы» сұхбат-полилог
Ғ.Сланов атындағы облыстық ғылыми әмбебап кітапханасында ұлы күйші Құрманғазы Сағырбайұлының туғанына 200 жыл толуына орай «Құрманғазының мәңгілік мұрасы» тақырыбында сұхбат-полилог өтті.
Ұлы сазгер Құрманғазы шығармаларында өз дәуірінің қоғамдық болмысын халықтың ауыр тұрмысын, мұңын, арманын, қуанышын, таңғажайып көркем табиғат құбылыстарын көрсете білген. Күйші туған халқын толғандырған ой-арманды қос ішекті домбыраның күшімен күйге айналдырып, сөйлете білді. Ол өз туындылары арқылы халқымыздың мәдени дамуына қомақты үлес қосты.
Шара барысында кітапханашы Құрманғазы Сағырбайұлы туралы мәліметтерді әңгімесіне арқау етті. Сондай-ақ, дәулескер күйшінің «Сарыарқа», «Алатау» атты шығармалары мен аталған тақырып аясында композитордың шығармашылығынан жасақталған кітап көрмесі оқырмандар назарына ұсынылды. Кітапхана қызметкері, ақын Манарбек Сатыбалдыұлы Құрманғазыға арнаған шығармасын орындап, кеш шырайын аша түсті.
Шараның мақсаты: Күйші-композитор, қазақтың аспапты музыка өнерінің классигі, ұлттық музыка мектебінің негізін салған Құрманғазы Сағырбайұлының шығармаларын оқырман қауымға насихаттау.
